:

1 Tawarikh 22

1

Ma’kadami Daud nakua: Indemote tu banuanNa PUANG Kapenomban, sia inde dukamo te tu inan pemalaran dinii mantunu napoinan pemalaran mintu’ to Israel.

Urrampun apa la dipake umpabendan Banua Kabusungan 2

Mesuami Daud umpasirampunni tu mintu’ to sae lan lu tondok Israel, anna suai tu ba’tu pira-pira to ma’pa’ batu la umpa’i tu batu la dipake umpabendan banuanNa Puang Matua.

3

Narampunmi Daud tu bassi buda tongan la dipakuan papan babangan sia la dipotangki’; sia tambaga tang dikemba’mo ditimbang tu budanna;

4

sia kayu arasi’ tang dikemba’mo budanna, belanna iatu kayu arasi’ nabaa to Sidon sia to Tirus lako Daud buda tonganmo.

5

Belanna natangnga’ Daud, kumua iatu anakku Salomo mangurapa sia tang matona’pa, na iatu banua la dipabendanan PUANG sipatu la kapua tongan anna undaoanni mintu’ banua kalelean sia mala’bi’ lan mintu’ tondok; iamoto kurampunni totemo tu apa la napake. Susimoto tu Daud urampunni dolo tu apa la dipake lendu’ budanna, namane mate.

6

Attu iato natambaimi tu Salomo, anakna muane, napasanni kumua la umpabendanan PUANG misa’ banua, Kapenombanna to Israel.

7

Ma’kadami tu Daud lako Salomo nakua: E anakku, lanmo penaangku la umpabendanan misa’ banua sanganNa PUANG, Kapenombangku.

8

Apa sae tu kadanNa PUANG lako kaleku Nakua: Mangkamoko umpatibollo buda rara sia umpogau’moko rari kapua; tae’mo muma’din umpabendanan misa’ banua sangangKu, belanna umpatibollomoko buda rara dao te kuli’na padang dio oloKu.

9

Manassa den misa’ pia muane la dipadadiangko; na ia la dadi misa’ to marampa’, belanna Aku la urrinding pala’i dio mai mintu’ ualinna tiku lao, anna torro manaman. Belanna la disangai Salomo sia Aku la ungkamasei kamarampasan sia kamakarimmanan dio lu tondok Israel to ke linona.

10

Iamo la umpabendanan misa’ banua sangangKu; na iamo la Kupoanak, sia Akumo tu la napoAmbe’; Akumo la umpamanda’i tu isungan kadatuanna dio lu to Israel sae lakona.

11

Ianna susito, na PUANGmora la urrondongko, ammu maupa’ umpabendan banuanNa PUANG, Kapenombammu, susitu mangka Napokada diona kalemu.

12

Ondongpi la Nakamaseiko PUANG kamatarrusan sia kapaissanan, sia la Naangka’ko umparenta to Israel, ammu karitutui tu sukaran alukNa PUANG, Kapenombammu.

13

Manasa la maupa’ko, ke muingaranni sia mukaritutui tonganni tu mintu’ apa mangka Napondok PUANG sia mintu’ atoran, mangka Napasan PUANG lako Musa, anna papassananni to Israel. La batta’ko sia la baraniko; da mumataku’ sia da mutiramban.

14

Moi angku lan kamaparrisan kurampunan duka banuanNa PUANG tu bulaan saratu’ sa’bunna talenta, na iatu salaka sangsa’bu sa’bunna talenta, na iatu tambaga sola bassi tang dikemba’mo ditimbang tu budanna, sia kurampun duka tu kayu sola batu; iatu iannate la murangngannipa.

15

Sia inang den bangmo tu mai to pande, iamotu to ma’pa’ batu sia pande batu sia pande kayu sia tang dikemba’mo budanna tu to pande dio lu ma’rupa-rupa pengkarangan,

16

iamotu mai pareanan bulaan, salaka, tambaga sia bassi. La muparandukmo mukarang! Na PUANGmora urrondongko.

17

Napa’parentammi Daud lako mintu’ pangulu to Israel ussuai la untundui Salomo, nakua:

18

Tang PUANG Kapenombammiraka urrondongkomi, sia tang Nakamaseirokomika kamarampasan tiku lao, belanna Nasorongmo tu mintu’ to umpa’tondokki tondok iate tama limangku, naurungan iatu pa’tondokan mengkanorong dio oloNa PUANG sia dio tingayona taunNa.

19

Totemo la mipakalebu tallang tu penaammi sia deatammi la umpengkaolai PUANG, Kapenombammi. Iamoto sangtiangkarangkomi la umbangunni tu inan maindanNa PUANG Kapenomban, anna iatu patti basseNa PUANG sia mintu’ pareanan maindanNa Puang Matua ma’din dibaa lako banua iato, tu dipabendanan sanganNa PUANG.

Link: